୨୩ ଅକ୍ଟୋବର ୨୦୨୨ ଅର୍ଥାତ ଆଜିର ଦିନରେ ଭାରତୀୟ ଷ୍ଟାର ବ୍ୟାଟ୍ସମ୍ୟାନ ବିରାଟ କୋହଲି ପାକିସ୍ତାନ ବିପକ୍ଷ ମ୍ୟାଚରେ ଏକ ଚମତ୍କାର ଇନିଂସ ଖେଳି ପାକିସ୍ତାନକୁ ଧରାଶାୟୀ କରିଥିଲେ ଏବଂ ବିଜୟ ହାସଲ କରିଥିଲେ । ଦ୍ଵିତୀୟ ଇନିଂସରେ ବ୍ୟାଟିଂ କରୁଥିବାବେଳେ ବିରାଟ କୋହଲି ୫୩ ବଲରେ ୮୨ ରନ ସଂଗ୍ରହ କରି ଭାରତକୁ ବିଜୟୀ କରିବା ସହ ଟି-୨୦ ବିଶ୍ୱକପରେ ଏହି ମହାମୁକାବିଲାରେ ମ୍ୟାଚର ଶ୍ରେଷ୍ଠ ଖେଳାଳି ରୂପେ ବିବେଚିତ ହୋଇଥିଲେ ।
କ୍ରିକେଟ ଇତିହାସରେ ବିରାଟ ଅନେକ ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିବାବେଳେ ଏହି ଇନିଂସକୁ ସର୍ବୋତ୍ତମ କହିଲେ ଅତ୍ୟୁକ୍ତି ହେବନାହିଁ । କାରଣ ଆଜିର ଦିନରେ ଟି-୨୦ ବିଶ୍ୱକପର ୧୬ ତମ ମ୍ୟାଚରେ ଭାରତ ଓ ପାକିସ୍ତାନ ମୁହାଁମୁହିଁ ହୋ
ଇଥିଲେ । ପାକିସ୍ତାନ ପ୍ରଥମେ ବ୍ୟାଟିଂ କରି ୧୫୯ ରନ ସଂଗ୍ରହ କରିଥିଲା। ଦ୍ଵିତୀୟ ଇନିଂସରେ ଭାରତ ୩୧ ରନରେ ୪ଟି ୱିକେଟ୍ ହରାଇ ସାରିଥିଲା । କିନ୍ତୁ ଅନ୍ୟପଟେ ବିରାଟ କୋହଲି ବ୍ୟାଟିଂ କରୁଥିବାବେଳେ ଶେଷ ଓଭର ପର୍ଯ୍ୟନ୍ତ ବ୍ୟାଟିଂ କରି ପାକିସ୍ତାନକୁ ଧରାଶାୟୀ କରିଥିଲେ ।
ତେବେ ସମ୍ପୂର୍ଣ୍ଣ ମ୍ୟାଚରେ ଘାତକ ବୋଲିଂ କରୁଥିବା ହରିଶ ରୋୖଫ ୧୯ ତମ ଓଭର ବୋଲିଂ କରୁଥିବାବେଳେ ଓଭରର ଶେଷ ଦୁଇଟି ବଲରେ ଦୁଇଟି ବିଶାଳ ଛକ୍କା ମାରି ଭାରତ ବିଜୟ ସୀମା ପାଖକୁ ନେଇଥିଲେ ବିରାଟ ଏବଂ ଶେଷ ଓଭରରେ ୧୬ ରନ ଆବଶ୍ୟକ ଥିବାବେଳେ ବିରାଟ ଏକ ଛକ୍କା ମାରିଥିଲେ ଓ ଭାରତ ବିଜୟୀ ହୋଇଥିଲା । ବିରାଟଙ୍କ ଏହି ଇନିଂସ ଏବଂ ଏଭଳି ମ୍ୟାଚ ଆଜି ମଧ୍ୟ ଭାରତୀୟ କ୍ରୀଡ଼ାପ୍ରେମୀଙ୍କ ମନରେ ସତେଜ ହୋଇ ରହିଛି ।